Sagnasaumur í Bayeux

Ferðafélagarnir fyrir utan Bayeux safnið ásamt safnstjóranum.

Áhugafólk um Njálurefilinn fór til Frakklands dagana 25. - 29. apríl 2019 til að skoða Bayeux-refilinn á Bayeux Museum. Refilinn er 70 metra langur og er á heimsminjaskrá Unesco. Hann segir frá orrustunni við Hastings, þegar Vilhjálmur sigursæli lagði England undir sig árið 1066. Það fór straumur um marga í hópnum þegar komið var inn í portið á safninu. Hópurinn var leiddur í gegnum söguna með hljóð-leiðsögn og þótti sumum nóg um hraðann sem var á því ferðalagi enda margur sem vildi virða betur fyrir sér ýmis smáatriði í reflinum. En þetta er gert til að tryggja flæði í gegnum sýninguna sem 400.000 manns skoða á ári hverju og allt að 3000 manns á dag. Þegar hópurinn hafði farið í gegnum sýninguna tók safnstjórinn Antoine Verney á móti honum og fræddi hann um sögu og varðveislu refilsins.

Það er mikið vandaverk að varðveita svo gamalt listaverk og að mörgu að huga í því sambandi. Nú stendur til á næstu árum að byggja nýtt hús yfir listaverkið sem er í eigu Franska ríkisins og sagði Verney hópnum að ágreiningur væri um hvernig refillinn yrði sýndur í hinu nýja húsnæði. Hvort leggja ætti áherslu á að sýna listaverkið eins og hugsað var í upphafi eða að meiri áhersla verði lögð á varðveisluna. 

Ekki er laust við að smá kvíðahroll hafi sett að sumum í hópnum, þegar hugur var leiddur að varðveislu hinn 90 metra langa Njálu-refils. Í öllu falli duldist engum að við höfðum fengið mikilvægar og gagnlegar upplýsingar. Að lokum færðu hópurinn Hr. Verney nokkrar gjafir, m.a. hóp-saumaða mynd úr Njálu-reflinum. Heimsóknin á safnið var áhrifarík og ljóst að að mörgu þarf að huga þegar kemur að uppsetningu og varðveislu Njálu-refilsins. 

Í ferðinni var einnig farið á slóðir innrásarinnar í Normandí og einnig sáum við dómkirkjuna í Bayeux og margt fleira. Í ferðinni naut hópurinn styrkrar leiðsagnar Parísardömunnar Kristínar Jónsdóttur sem fer um París og Frakkland með íslenska ferðamenn, sjá: http://www.parisardaman.com/

Ferðin tókst einstaklega vel, var bæði fræðandi og gagnleg á allan máta. Víst er að Njálu-refillinn á eftir að njóta góðs af þeirri fræðslu sem aðstandendur hans fengu í ferðinni.

Gunnhildur og Cristína afhenda safnstjóranum Antoine Verney handsaumaða mynd úr Njálureflinum.